DONDEREN – De volmachten van het “Nei Drèents Geneutschap” hebt zaoterdag in het RTV Drenthe-programma “Hemmeltied” de Algemiene Anfieter Award 2011 toekend an de PeerGroup uut Dundern. Artistiek leider Sjoerd Wagenaar nam de pries in ontvangst.
Het juryrapport zee der dit van: De leden van de PeerGroup bint biezunder actieve en productieve theatermakers die non opereert vanoet Dundern. Zie bint an de gang gaon met een mooi stuk naolaotenschap van de stichting Drentse Muziek Maatschappij en heur veurzitter Egbert Meijers. Het is een proces worden dat oetèendelk de Drentse Bluesopera opleverd hef. Theatraol en muzikaol uniek in zien soort, nog nooit in Drenthe verteund. En weer stun de Hunze in ’t middelpunt. Veurig jaor in Groot Hunzelaand, non gebeurde het op de Hunzehof en kreeg het een veurlopig èende in het Amsterdamse Carré. En dat alles in het jaor, waorin Drenthe zien blueskeuning verleur. De beide aandere genomineerden, de gemiente Noordenveld in de personen van de wetholders Oeds Keizer en Otto Huisman en burgemeester Eric van Oosterhout van de gemiente Aa en Hunze kregen een oorkonde. Ok die waren wies met de erkenning die uut de nominaotie sprek. Noordenveld weur nomineerd veur, zoas de jury het zee: Het College hef de straoten van een neibouwwiek Drèentstaolige naomen geven. Vogelnaomen, zoas katoel, zwalvie en holtdoef. Daor vul ij de kolommen van landelijke bladen niet met, maor dat huuf ok niet. Het giet um de bedoelings daorachter. As der meugelkheden bint um de eigen limtige streektaol een plaots te geven in de gemiente waor men woont, dan moej daor op inspeulen. As Eric van Oosterhout, zee het juryrapport, zien culturiele registers löstrekt – en dat bint der veul – dan valt het aaltied weer op hoe groot zien betrökkenheid is op Drentstaoligheid, ok al hef e zien wortels hier niet liggen. De raod kreg in meert vast en zeker streektaol te heuren en as op de PABO in Emmen een symposium holden wordt over streektaol komp e opdraoven as dagveurzitter. Dat ziew niet veul burgemeesters doen! Bestuurders as Van Oosterhout die de streektaol zo’n warm hart toedraagt, die moew koestern en as ’t kan vastholden. De Zoorholtpries, veur het achteruuthelpen van de streektaol, is dit jaor veur de tweide achterienvolgende maol niet uutreikt. De ofschrikwekkende warking van de pries wordt aal starker.
